Hera de las questions

 Tà qui e son hèitas las formacions a la lenga occitana deu CFPÒC Novèla Aquitània?

Las formacions deu CFPÒC Novèla Aquitània que son hèitas tà tota persona qui a la majoritat e qui vòu formà’s personaument o per necessitat professionau a la lenga e a la cultura occitanas. Ne i a dongas pas ua edat maximum legau mes ua edat minimum de 18 ans en devath de la quau ne podem pas préner la persona en formacion.

 E i a un limit d’edat tà seguir ua formacion en Formacion continua ?

Ne i a pas nat limit d’edat. Totun, tà seguir ua formacion dens l’encastre deu Programa Regionau de Desvolopament de las Formacions Professionaus (PRDFP), que cau lo candidat que sii hòra deu sistèma escolar despuish mei de 6 mes.

 E cau dejà parlar occitan tà poder seguir l’ua de las formacions deu CFPÒC Novèla Aquitània ?

Non, parlar occitan n’ei pas necessari. A cada session, l’un deus nostes formators que torna préner las basas de la gramatica, de la conjugason… dab un petit grop d’estagiaris començants entà que cada estagiari avanci peu miélher en la lenga.

 Èm obligats de començar las formacions au mes de seteme o se podem començar quan que sii en l’annada ?

Lo noste cursus de formacion qu’ei elaborat de mòda que posquiatz començar la formacion tot lo long de l’annada quan non parlaratz ni non compreneratz pas briga l’occitan. Mercés a la nosta formacion modulara, los estagiaris, despartits en petits grops de nivèus qu’avançan au lor ritme e en un ambient conviviau.

 E poish participar a un « Estagi Parlar » en tot contunhar de seguir los « Setmanèrs » ?

Nat problèma. Estant complementàrias las duas formacions, que podetz a tot moment de l’annada viéner seguir un « Estagi PARLAR » en tot contunhar la vòsta formacion dab los cors deu ser setmanèrs. De mei, tà cada « Estagi PARLAR », segon lo nivèu deus aprenents, que ns’avisam d’organizar sosgrops de nivèu taus cors tà que cadun e posqui avançar au ritme son.

 Existeish un minimum e un maximum d‘estagiaris tà qu’ua formacion e posqui foncionar ?

Òc, tà un estagi lo minimum qu’ei de 5 estagiaris inscrivuts. Senon que cambiam la data o qu’anullam l’estagi.

Entaus “Setmanèrs”, lo minimum qu’ei 5 aprenents e lo maximum 12.

Quin inscríve’s a l’ua de las vòstas formacions ?

Las formacions a la lenga

Volhatz anar véder a las paginas deus “Estagis Parlar” e deus “Setmanèrs“.

• Si ètz salariat :

Volhatz contactar lo CFPÒC entà aviéne’s tà un entertien. Arron aqueth entertien, lo CFPÒC que’vs diserà se lo vòste projècte e lo vòste nivèu en occitan e son en adequacion dab la formacion desirada.

 Qu’èi mensh de 20 ans, e poish seguir l’ua de las vòstas formacions ?

Òc, que’vs cau totun aver 18 ans hèits si voletz entinoar ua formacion a la lenga dab “Estagis PARLAR” o “Setmanèrs”. Entaus menors de 15 a 17 ans hèits, ua demanda escriuta au conselh d’administracion deu CFPÒC acompanhada d’ua autorizacion parentau que son indispensablas. Aqueste que pòt acordar o arrefusar la vòsta demanda. Ua responsa escriuta que’vs serà enviada a casa.

Entà la Formacion Professionau en lenga e cultura occitanas modèrnas, que devetz aver peu mensh 16 ans e lo CFPÒC Novèla Aquitània que v’acompanharà entà l’elaboracion deu dossièr remborsament OPCA o Pôle Emploi (Pòle Emplec).

Qui ei pertocat per la formacion professionau en lenga e cultura occitanas ?

Que son pertocats a l’encòp, los emplegaires qui vòlen formar daubuns deu lor personau en lenga e cultura occitanas en maines particulars, en relacion dab las necèras de l’enterpresa et deu pòste aucupat per lo personau, mes tanben, que son pertocats los salariats chepicós d’aquesir ua competéncia en occitan per rasons professionaus o qui vòlen conéisher l’occitan entà melhorar las lors relacions en l’ambient socioprofessionau au demiei deu quau e viran. Qu’entra tanben en lo CPA (Compte Personau d’Activitat) deu quau e beneficia tot salariat.

 Quin se debana la formacion professionau en lenga e cultura occitanas ?

Aquera formacion qu’ei perpausada sii en individuau, sii per petit grop (10 estagiaris maxi.), tostemps en preséncia deu formator, lo mejan mei eficaç entà har progrès en lengas vivas.

Modules de tot ordi que son perpausats qui’s conjunhen principaument a l’entorn de cors individualizats per sedenças de 2 òras o segon la convencion de formacion establida.

 E pòden aver un programa de formacion professionau personalizat ?

Òc, Començant, Intermediari, Avançat, lo programa de formacion qu’ei establit segon lo nivèu, los besonhs e los objectius deu/deus salariat(s) arron ua evaluacion realizada en debut de formacion, tà determinar lo nivèu iniciau.

Oraris, ritme e lòcs deus cors que son adaptats a l’emplec deu temps deu/deus salariat(s) ; dab l’aprentissatge d’un lexic ajustat a las especificitats deu contèxte professionau.

D’ua auta part, aqueth ordi de formacion que permet de respóner a l’aprentissatge d’un occitan tant usuau com professionau a l’orau com a l’escriut. (vocabulari generau, compreneson, exercicis, mesa en situacion, vocabulari tecnic, preparacion a l’escriut, etc.)

 Ei possible d’aver ua formacion de sensibilizacion a la cultura occitana ?

Òc, pr’amor en mei de la nosta equipa de formators professionaus diplomats e experimentats, que ns’emparam sus l’intervencion de formators vacataris. Mei especializats en maines taus com psicologia, lexicologia, lingüistica, literatura, istòria, geografia, toponimia, musicas, danças, arts plastics, teatre, fauna e flòra, etc., que garanteishen atau ua responsa adaptada aus vòts exprimits. Aquera sensibilizacion que permet aus navèths arribaires de compréner mei plan lo lor environament.

 Que soi salariat, la mea formacion e pòt estar finançada ?

De segur. Qu’èm un organisme de formacion professionau aprovat tau com per la DRTEFP suu n° 72 64 01977 64. Uas condicions que son totun de respectar.

 Quaus son los agís qui cau seguir entà beneficiar d’un Conget Individuau de formacion (C.I.F.) ?

Entà obtiéner lo vòste C.I.F., que’vs cau directament préner contacte dab la direccion de la vòsta enterpresa au mensh cinc mes abans la vòsta entrada en formacion. Lo benefici deu conget qu’ei de dret, sonque l’emplegaire estimi que la vòsta abséncia e poderé aver consequéncias prejudiciablas entau bon anar de l’enterpresa.

L’emplegaire que deu balhar la soa responsa en los trenta dias qui segueishen la recepcion de la demanda. Responsa qui pòt estar un acòrd, un reget o un repòrt.

Arron acòrd deu vòste emplegaire, que devetz har la vòsta demanda de dossièr a l’organisme paritari collector de la formacion professionau au quau la vòsta enterpresa e cotiza (proveditz-ve deu vòste bulletin de paga). Qu’ei important de saber qu’ac cau har peu mensh quate mes (120 dias) abans lo debut de la vòsta formacion, tà estar a temps. Autanlèu recebut lo dossièr, volhatz har completà’u peu CFPÒC et peu vòste emplegaire qui v’a dejà acordat la soa autorizacion d’abséncia sus papèr libre.

Verificatz que totas las rubricas deu vòste dossièr e siin completadas e qu’ètz d’acòrd dab las informacions hornidas peu vòste emplegaire, dab las datas d’autorizacion d’abséncia e tanben dab los elements relatius a la vòsta formacion. Tà fenir, enviatz vos medish lo vòste dossièr completat com cau au mei tard tres mes (90 dias) abans lo debut de la formacion acompanhat de la fotocopia de las vòstas darrèras 12 ficas de paga, deu programa de la formacion causida, deu vòste C.V.

Lo vòste dossièr que serà alavetz examinat per la comission paritària qui’vs balharà lo son acòrd o las rasons deu reget deu vòste dossièr.

 E poish recéber un certificat de participacion ?

Òc. Sus simpla demanda de la vòsta part au secretariat administratiu deu CFPÒC, que receberatz, en cors o en fin de la vòsta formacion (« Estagis Parlar », Setmanèrs, “formacion professionau“…), un certificat de fin de formacion.

 E soi astrenhut a participar a mantuas sessions de formacion « Estagis PARLAR » o « Setmanèrs » entà passar las espròvas deu « Diplòma d’Escapolaire-A2 », B1, B2 et C1 ?

Non, que’vs poderatz a tot moment (qu‘àgitz hèit un o mantuns estagis, o qu‘àgitz seguit un o mantuns trimèstres de “Setmanèrs“), presentar a las espròvas tà l’examen d’Escapolaire nivèu A2, B1, B2 e C1. Que’vs poderatz tanben presentar en candidat libre.

 Quin se passan las espròvas de l’examen entà obtiéner los “Diplòmas” d’Escapolaire nivèu A2, B1, B2 e C1 ?

Las espròvas deus “Diplòmas” d’occitan gascon modèrne que’s debanan en ua jornada e en dus temps. Los formators qui participan a l’orau non son en nat cas los examinators/correctors de l’espròva.

Diplòma Escapolaire A2

L’examen que’s debana en dus temps: las espròvas comunas (tots los candidats amassa en ua medisha sala) que pertòcan :

• la compreneson orau (20 mn) : respóner aus questionaris de compreneson arron d’escotar documents enregistrats bracs pertocant la vita vitanta.

• la compreneson deus escriuts (30 mn) : respóner aus questionaris de compreneson sus documents escriuts bracs pertocant la vita vitanta.

• l’expression escriuta (40 mn) : redigir ua produccion (letra amicau, messatge…) de descripcion d’un eveniment o d’experiéncias personaus, de convit, de mercejaments, de desencusas, d’informacion…

L’espròva individuau que pertòca la produccion orau. (10 mn dab 10 mn de preparacion) e que consisteish en :

• un entertien dirigit

• un monològue

• un dialògue simulat

L’espròva individuau qu’ei organizada segon un ordi de passatge definit per avança e qui non pòt estar cambiat. Cada candidat que passa sol de cara a un par d’examinators e qu’ei enregistrat entà la correccion.

Diplòma B2

L’examen que’s debana en dus temps :

Las espròvas comunas (tots los candidats amassa en ua medisha sala) que pertòcan:

• la compreneson orau (30 mn) : respóner aus questionaris de compreneson arron d’escota de documents enregistrats (dialògue brac informatiu, argumentari long),

• la compreneson deus escriuts (45 mn) : respóner aus questionaris de compreneson sus dus documents (tèxte de caractèr informatiu, tèxte argumentatiu),

• l’expression escriuta (1 h 00) : redigir ua produccion pertocant ua presa de posicion personau argumentada (contribucion a un debat, letra formau, article critic…)

L’espròva individuau que pertòca la produccion orau (15 mn dab 10 mn de preparacion) e que consisteish a presentar e defénder un punt de vista en partir d’un document brac.

L’espròva individuau qu’ei organizada segon un ordi de passatge definit per avança e qui non pòt estar cambiat. Cada candidat que passa sol de cara a un par d’examinators e qu’ei enregistrat entà la correccion.

 Que desiri formà’m a distància, e i a ua possibilitat de formacion via Internet o a distància en la vòsta estructura ?

Òc en partenariat dab lo CFPO-MP qu’avem la possibilitat de formacion a distància via la platafòrma e-learning dab lo CFPÒC Novèla Aquitània.

Que trobaratz, en aqueth espaci, responsas a las questions mei sovent pausadas sus l’aprentissatge de l’occitan en Novèla Aquitània.

Segur, si ne trobatz pas çò que cercatz, contactatz-nse : aquitania@cfpoc.com o au 05 59 67 20 75 .