Facebook
    LinkedIn
    YOUTUBE
  • Français
  • Occitan

Ensenhaires Educacion Nacionau (ENSENHAR)

Ensenhar l’occitan en lo public :

Lo CFPÒC Novèla Aquitània que’s carga de la formacion continua en lenga occitana entà l’obtencion de l’abilitacion o de la certificacion en lenga regionau taus ensenhaires de l’Educacion Nacionau (1èr e 2au grads).

Lo dispositiu ENSENHAR Professor que beneficia deu sostien de la region Navèra Aquitània via l’Ofici public de la lenga occitana e tanben lo de l’Educacion nacionau. En efèit, despuish 2019, lo rectorat de l’academia de Bordèu qu’assegura un manteniment totau deu salari de l’ensenhaire pendent la totalitat de la formacion.

L’objectiu d’aqueste dispositiu qu’ei de promòver lo desvolopament de la cordèra bilingua lenga regionau occitan en l’ensenhament public.

La formacion :

Que s’ageish d’ua formacion intensiva de 624 òras, repartidas en 10 mes taus ensenhaires deu 1èr grad e deu 2nd grad.

Que’s debana aus nostes locaus o en sites decentralizats (Bordèu o Tolosa per exemple), 4 dias per setmana, dab 10 setmanas d’estagi despartidas enter classas d’arcuelh e lo CAPÒC.

L’objectiu d’aquera formacion qu’ei multiple :

  • aquesir un nivèu de lenga correspondent au nivèu B1/B2 du QECRL (passatge deu DCL exigit),
  • aquesir los apèrs lingüistics e culturaus necessaris a l’ensenhament bilingüe,
  • arribar a ua autonomia lengatgèra pròcha d’un locutor natiu entà formar locutors futurs.

Tots los ensenhaires qui seguín aquera formacion qu’obtienón lo DCL e tanben l’abilitacion/certificacion.

Testimònis :

Domenja M. – Professora dens lo segondari

La formacion que recebom qu’èra de gran qualitat e variada, mercés a las personalitats divèrsas deus formadors, e mercés tanben aus lors apròchis pedagogics complementaris.

En mei deus contienguts interessants deus cors e de la lor progression plan pensada, çò qu’èi especiaument apreciat qu’ei la dimension umana, l’escota de tots los formadors, lo sostien e l’acompanhament individualizat, pr’amor quan s’ageish de transméter e d’apréner ua lenga, mes tanben de descobrir l’esperit d’ua cultura, la dimension afectiva e la hidança que son hèra importantas, e aqueths ingredients indispensables qu’i èran tots e dosats com cau !

Mercés per tot a cadun,

Sandrine L. – Professora de las Escòlas

Dens l’encastre de la convencion entre la Region Novèla Aquitània e l’Academia de Bordèu, que beneficièi d’un conget de formacion de 6 mes e de la borsa « ENSENHAR », entà ensenhar en classa bilingua. Au cap de la formacion professionau deu CFPÒC Novèla Aquitània, que podoi obtiéner lo nivèu B2 deu DCL, e l’abilitacion en lenga de l’Educacion Nacionau.

Au dia de uei en pòste en classa bilingua deus Pirenèus-Atlantics, que participi atau aus besonhs de personau qualificat, en respóner a la demanda creishenta d’oberturas de classas bilinguas en Novèla Aquitània.

Qu’arremercii l’equipa pedagogica deu CFPÒC Novèla Aquitània per las soas competéncias e la soa eficacitat, pendent aquera formacion.

témoin enseignante occitan

Pauline I. – Professora de las Escòlas

Qu’ensenhèi en francés de 2012 a 2015. Au mes de deceme de 2015, qu’integrèi ua formacion de 6 mes tà passar ua abilitacion en lenga nosta. Desempuish aquesta formacion, qu’obtienoi un pòste miei-temps mairau/miei-temps elementari. Tornar préner los cors dens la lenga qu’ei hèra ric e motivant.

De mei, ne m’agradava pas d’ensenhar aus petits de 3 ans mes… en occitan, be me’n dau ua ! De véder la rapiditat dens los aprentissatges e l’estrambòrd deus mainats per la lenga, que m’a balhat hami de demorar dab aquèth nivèu. Dab los mei grans, qu’ei hèra enriquidor de poder har ligams enter las duas lengas.

Personaument, que soi engatjada dab duas associacions occitanas. Dinc ací, n’escambiavi pas briga. Que comprenèvi, mes ne gausavi pas parlar. Adara, que poish escambiar dab los autes shens aver a cercà’m los mots.

Que passèi 6 mes deus bons au CFPÒC Novèla Aquitània. Qu’i anavi 3 còps setmana, çò qui’m permetèva d’assimilar e de tribalhar serenament los punts de gramatica e de vocabulari. L’equipa qu’èra formidabla. La directora Marie-Hélène e las formadoras Claire, Nathalie e Laure qu’èran planvolentas dab nosautes. L’ambient qu’èra hèra bon, qu’i anavam dab lo sorríder.

Que tribalhavam per petits grops, deu còp, que progressàvam hèra viste. Au cap de 6 mes, mentre qu’avèvi un nivèu pro feblòt en arribar, que passèi lo B2. Augan, que preni enqüèra cors tà poder passar lo C1. Qu’ei pròva que’s passa plan 🙂

Guillaume C. – Professor de las Escòlas

L’occitan que’m permet d’escambiar dab las generacions, especiaument las ancianas, mès tanben de parlar la lenga a casa dab la mea familha (la mairana per exemple). E tanben de transméter la lenga a las navèras generacions a l’escòla : qu’ei un apèr de tribalh puishque l’emplegui cada dia en classa.

Lo CFPÒC que’m permetó d’obtiéner l’abilitacion e lo nivèu de qui cau deu DCL dab ua formacion de grana qualitat, un acompanhement, ua escota, conselhs… Ua ubertura culturau au sens larga de l’occitan mei gran qu’aví dejà.

Tà’n saber mei a perpaus deu dispositiu Ensenhar Professor, visitatz lo site de l’OPLO

Per questions relativas ad aquera formacion, contactatz-nse.