Facebook
    LinkedIn
    YOUTUBE
  • Français
  • Occitan

QECRL (Quadre europèu comun de referéncia tà las lengas)

QECRL (Quadre europèu comun de referéncia tà las lengas)

Lo Quadre europèu comun de referéncia tà las lengas : Apréner, Ensenhar, Evaluar (QECRL) qu’ei un document publicat peu Conselh de l’Euròpa en 2001, qui indica nivèus de mestresa d’ua lenga estrangèra, en foncion de saber-har en diferents maines de competéncia.

Aqueths nivèus que constitueishen actuaument la referéncia en lo maine de l’aprentissatge, e de l’ensenhament de las lengas. L’innovacion principau deu QECRL qu’ei de hicar en plaça ua escala d’evaluacion de mestresa d’ua lenga, independenta de l’organisme evaluador, e transpausabla a quina lenga que sia, contràriament aus autes sistèmas qui son sovent pròpis a un país, e lhèu a un organisme, generaument aplicables a ua sola lenga.

Per aqueras rasons, mei anar mei d’organismes evaluadors qu’alinhan las lors escalas d’evaluacion suus nivèus deu QECRL, o au mensh que horneishen ua grasilha de conversion. Aqueth document qu’indica 6 nivèus comuns de referéncia.

Ací devath que n’avetz la lista; dab ua descripcion tà cadun, qui correspon a l’acquisicion deu nivèu.

Tad aver ua descripcion mei precisa, volhatz reportar-ve au document oficiau disponible suu site deu Conselh de l’ Euròpa.

Escala deus nivèus deu Quadre

A1 – Nivèu Introductiu o Descobèrta

Mots-claus : questions simplas, environament pròche e familiar.

Acquisicion deu nivèu A1 : L’estudiant que pòt compréner e utilizar expressions familiaras e quotidianas, e tanben enonciats hèra simples, qui permeten de satisfar besonhs concrèts. Que’s pòt presentar o presentar quauqu’un e pausar a ua persona questions la pertocant (lòc d’abitacion, relacions, çò qui l’apartien…). Que pòt respóner au medish tipe de questions. Que pòt comunicar de faiçon simpla se l’interlocutor e parla a plaser, distintament, e se’s hè cooperatiu.

A2 – Nivèu Intermediari o de Subervita

Mots-claus : descripcions, conversacions simplas.

Acquisicion deu nivèu A2 : L’estudiant que pòt compréner frasas isoladas e expressions frequentament utilizadas, en relacion dab domenis immediats de prioritat (informacions personaus o familhaus, crompas, environament pròche, tribalh).

Que pòt comunicar au parat de prètzhèits simples e abituaus, qui ne demandan pas qu’un escambi simple e dirècte d’informacions a perpaus de subjèctes familiars e costumèrs. Que pòt descríver dab mejans simples la soa formacion, lo son environament immediat, e evocar subjèctes familiars e costumèrs, qui corresponen a besonhs immediats.

B1 – Nivèu Lindau

Mots-claus : debut d’autonomia ; virar-s’ac, exprimir la soa opinion.

Acquisicion deu nivèu B1 : L’estudiant que pòt compréner los punts màgers quan un lengatge clar e estandard ei utilizat e se s’ageish de causas familiaras, pertocant lo tribalh, l’escòla, los lésers.

Que s’ac pòt virar dab la màger part de las situacions encontradas en viatge, en ua region on la lenga ei parlada. Que pòt prodúser un devís simple e coerent a perpaus de subjèctes familiars, e en los sons maines d’interès. Que pòt contar un eveniment, ua experiéncia, o un saunei, descríver un espèr o un objectiu, e expausar brèument rasons o explicacions tà un projècte o ua idea.

B2 – Nivèu Avançat o Independent

Mots-claus: compreneson correnta e capacitat a devisar; balhar un avís, sostiéner sistematicament ua argumentacion.

Acquisicion deu nivèu B2 : L’estudiant que pòt compréner lo contiengut màger de subjèctes concrets o abstrèits en un tèxte complèxe, dab un devís tecnic en la soa especialitat. Que pòt comunicar dab un nivèu d’espontaneïtat e d’aisider au parat d’ua conversacion dab un locutor natiu, shens nada tension enter eths. Que’s pòt exprimir d’un biaish clar e detalhat a perpaus d’ua grana garba de subjèctes, balhar un avís pertocant un subjècte d’actualitat, e expausar los avantatges e inconvenients de diferentas possibilitats.

C1 – Nivèu Autonòme : entà un usatge regular en contèxtes de dificultat rasonabla

Mots-claus : exprimí’s espontanèument e correntament, pro bona mestria.

Acquisicion deu nivèu C1 : L’estudiant que pòt compréner ua grana garba de tèxtes longs e exigents, e tanben gahar lo hiu de signficacions implicitas. Que pòt exprimí’s espontanèument e correntament, shens tròp aparentament dever cercà’s los mots. Que pòt utilizar la lenga d’un biaish eficaç e aisit en la vita sociau, professionau, o academica. Que’s pòt exprimir a perpaus de subjèctes complèxes de faiçon clara e plan estructurada, e manifestar lo son contròle deus utís d’organizacion, d’articulacion, e de coesion deu devís.

Consultatz lo quadre europèu comun de referéncia tà las lengas suu Portau nacionau deus professionaus de l’educacion EDUSCOL