Que parlatz occitan e que’vs sentitz la vocacion d’ensenhar a un public mainadèc ? E v’agrada de tribalhar en equipa ? Ètz geograficament mobile ? Ètz titular d’ua licéncia de l’ensenhament superior ?
Hètz-ve professor de las escòlas Calandreta, en lo hialat de las escòlas immersivas bilingüas occitan-francés. Qu’ajudaratz los « Calandrons » a parlar e a escríver/léger en occitan ; que portaratz aus mainats ua cultura d’obertura e de respècte de l’aute. Que’us balharatz las coneishenças escolaras de basa, mercés a ua progression pedagogica.
Qui formar ?
Las personas titularas d’ua licéncia, qui practican l’occitan e qui desiran ensenhà’u.
Formacion Futur Regent de Calandretas : un cursus complet en 3 annadas escolaras
L’examen d’entrada que s’apèra « La Jurada » : los candidats acceptats a « La Jurada » per ua Federacion Regionau de las Calandretas que’s hèn « Calandrins », e qu’entran en purmèra annada de formacion iniciau de « regent » (ensenhaire).
Lo CFPO que pren en carga aquera purmèra annada de formacion, mercés au sostien financèr deu Conselh Regionau d’Occitania-Pirenèus-Mediterranèa. Los « Calandrins » que participan a 10 estagis teorics a Besièrs, e a 30 setmanas d’estagis de practicas professionaus enquadradas per un ensenhaire titular.
Descriptiu de las 3 annadas de formacion :
volhatz consultar lo site web d’APRENE
Modalitats de recrutament :
- Après acceptacion auprès de l’un deus prescriptors deu hialat AIO de la Region Occitania-Pirenèus-Mediterranèa (prescripcion), cada candidat que serà convocat peu CFPO, entà un entertien a Besièrs.
- Au moment d’aqueth entertien, qu’encontrarà a diferents actors deu movement Calandreta (Federacion Regionau, establiment APRENE, professors d’escòla Calandreta), e tanben lo director pedagogic deu centre de formacion.
- Cada candidat qu’evocarà lo son projècte professionau. Aqueth entertien qu’a per mira d’evaluar lo son grad d’implicacion en la lenga occitana, e la lor capacitat a hicà’s au tribalh.
- Au cap de l’entertien, los representants de Calandreta, en partenariat estret dab lo director pedagogic deu CFPO, que decidiràn se cau perseguir dab la convocacion a la partida escriuta de la « Jurada ».
- Los candidats qui an satisfèit a l’entertien que seràn a la seguida convocats a ua jornada de produccion escriuta, a perpaus de subjèctes balhats en 4 maines : occitan, reflexion, matematicas e francés.
- Cada copia, anonima, que serà corregida per 2 correctors.
- Aqueth dispositiu que permet de pagerar las capacitats deu CFPO a miar los candidats de cap tà la mesa en òbra de las exigéncias de la Carta de las Calandretas, en classa e dens ua escòla, e au nivèu de competéncias exigidas peu Concors de Recrutament de Professor de las Escòlas (CRPE).
- La comission de decision que publicarà, ua setmana après, la lista deus estagiaris admés en formacion tà la rentrada seguenta.
Pre-requesit entà integrar la formacion :
- Coneishença de la lenga e de la cultura occitanas (orau e escriut – « Diplòma » nivèu Escapolaire-A2 deu QECRL de preferéncia).
- Coneishenças de basa en burotica indispensablas.
- Capacitat a investí’s e a tribalhar en autonomia.
- Hami de partatjar la lenga e la cultura occitanas.
Public pertocat :
Demandaires d’emplec : obligatòriament inscriuts a Pòle Emplec e orientats per l’un deus prescriptors de la region Occitania-Pirenèus-Mediterranèa (CIDFF, Pôle EMPLOI, Cap Emploi, MLI, APEC, conselhèrs d’insercion deus Conselhs Departamentaus)
Contiengut pedagogic de la formacion
- Module deus aprentissatges purmèrs en occitan
- Module en cicle deus aprentissatges fondamentaus, aprentissatge de la lectura
- Module en cicle deus apregondiments en situacion bilingua
- Module d’especializacion e evaluacion
- Module desvolopament duradís
- Seguit e acompanhament deus estagiaris / Dinamica d’emplec (TRE/TRS)
- Module d’apregondiment en lenga occitana (nivèu B1 – B2 deu QECRL)
- Formacion Obèrta A Distància (FOAD)
Tipe de pòste e foncion mirats au cap de la formacion
« Regents » en delegacion d’auxiliar en las escòlas Calandretas, o regent remplaçant dab possibilitat de titularizacion après lo concors deu CRPE especiau.
Debanament de la formacion (ritmes, duradas e finançament)
La formacion en occitan taus futurs « Regents » de las Calandretas qu’ei ua formacion de 10 mes a temps complet. Que començarà lo 04 de seteme de 2017 e que s’acabarà lo 29 de junh de 2018.
Hèra rica en contiengut (cors teorics e practics), que compren 637 òras de formacion au Centre a Besièrs, e 741 òras de formacion en enterpresa en 3 establiments diferents, en los 3 cicles de l’escòla primària.
Aquera accion de formacion, realizada mercés au sostien de la Region Occitania-Pirenèus-Mediterranèa, qu’ei finançada tà un efectiu maximum de 8 personas.
Validacion de la formacion : Atestacion de formacion
Tà’n saber mei, rendetz-ve directament suu site deu noste partenari, lo CFPO Lengadòc.