• Français
  • Occitan

Estagi d’ahortiment de gascon de la Formacion de Formators de Besièrs

La setmana deu 23 au 27 d’Abriu, juste arron la deus APRENE 1 de Besièrs, que’s debanè en Biarn l’estagi d’ahortiment de gascon deus aprenents de la Formacion de Formators de Besièrs, integraument organizada peu CFPÒC Novèla Aquitània. Qu’estó ua setmana de las bèras ! Lotjats en ua jaça a Ortès, los estagiaris que seguín alternativament cors de descobèrta deu gascon e activitats o visitas en ligam dirècte dab lo hialat culturau e lingüistic locau.
Atau, dab l’estudi de tèxtes gascons variats, de lexic, de fonologia e autas particularitats… La varianta nosta n’a pas mei de secrets entad eths. Solide que las visitas en lenga ahortín plan com calè aqueth estagi : la visita de la tor Moncada, l’expertisa en lenga deu Gilabèrt Nariòo, la visita de la bòrda Masseillou e de la soa produccion mellifèra, la cantèra dab l’Esquireta a Lescar, la toponimia e patronimia dab Pèir Salas, la presentacion deus Siulaires d’Aas, lo talhèr de danças dab Cultura de Noste a Ramós, la visita de la maison d’edicion Per Noste a Ortès, de l’InÒc e deu Congrès au Castèth d’Este de Vilhèra, la visita e participacion a ua emission de Ràdio País, atau com explics mei sus locucions e expressions deu Maurici Romieu… Chic de temps tà bohar, e totun soviers a fanègas !
Qu’esperam l’experiéncia e sia estada bona, e qu’arremerciam tanben calurosament a tots los partenaris qui ns’ajudèn entad auherir ua immersion autan variada e rica ! Au plaser, monde besierencs !